LAOAG CITY – Bumisita ni Presidente Ferdinand Marcos Jr. idiay Canada manipud Hulio 1 agingga Hulio 4 tapno paigetan ti relasion ti dua a pagilian ken papigsaen ti kooperasion iti depensa, seguridad, negosio, panagpuunan, enerhia ken dadduma pay nga strategic sector.
Makitaripnong ni Marcos ken ni Canadian Prime Minister Mark Carney tapno talantanen ti panangpalawa ti relasion para iti ekonomia ken dadduma pay a napapateg a banag.
Malaksid iti daytoy, makitaripnong pay ni Presidente Marcos kadagiti negosiante ken agpuunan idiay Canada tapno ilungalong dagiti oportunidad iti negosio iti Pilipinas.
Karaman iti panagbisitana ti pannakipagkitana iti Filipino community iti Vancouver.
Daytoy ti umuna nga opisial a panagbisita ti maysa a Presidente ti Pilipinas idiay Canada iti uneg ti sumurok maysa a dekada.
Makadua ti Presidente iti biahe ni First Lady Liza Marcos ken dadduma pay a miembro ti gabinete.
Ti panagbisita ni Presidente Marcos iti North America ket maiyataday iti imbitasion ni Canadian Prime Minister Mark Joseph Carney.
Ni dati a Presidente Benigno Simeon Aquino III ti naudi a Presidente ti Pilipinas ti nangiwayat ti state visit idiay Canada idi 2017.
