LAOAG CITY – Ginutigot ni Presidente Ferdinand Marcos Jr. ti kongreso nga ipasa ti gakat a mangamendar ti Rice Tariffication Law (RTL), a mangipalubos iti National Food Authority (NFA) nga agangkat ti bagas ken patalgeden ti presyo.
Inlawlawag ni Presidente Marcos nga iti kanito a mapalubusan ti National Food Authority nga agangkat ti bagas, makatulong daytoy, saan laeng a kadagiti mannalon no di ket para iti amin kangrunaan na kadagiti consumers gapu ta mapatalged na ti presyo ti bagas iti merkado.
Kuna pay ti presidente a ti pannakaamendar ti Rice Tarrification Law ket maysa laeng kadagiti addang nga ar-aramiden ti gobierno tapno mapasayaat ti buag dagiti mannalon a Pilipino iti baet dagiti karit iti panagbiag da.
Maipalagip nga iti laeng kallabes ket inaprubaran ti kamara de representantes iti maikatlo ken maudi a pannakaibasa ti nailungalong a gakat a maamendaran ti Rice Tarrification Law iti babaen ti House Bill 10381 nga addaan ti 231 nga affirmative votes, 3 a negative votes, ken maysa ti nag-abstein.
Inpakaammo pay ni Presidente Marcos a malaksid iti pannaka-amendar iti Rice Tarrification Law ket kumitkita pay ti gobierno ti weather-proof rice varieties tapno papigsaen ti produksyon ti bagas iti pagilian.
Innayon na a mangipaay met ti Philippine Center for Postharvest Development and Mechanization (PhilMech) ti makinarya kadagiti mannalon.
