LAOAG CITY – Indeklarar ni Presidente Ferdinand “Bongbong” Marcos Jr. ti Oktubre 30 iti tunggal tawen a kas “National Day of Charity”.
Maibasar iti Proclamation no. 598, daytoy ket mandato ti estado iti babaen ti Saligang Batas a mangipasigurado ti patas a social order tapnu masigurado ti kinarang-ay ken wayawaya dagiti tattao manipud iti kinapanglaw babaen kadagiti pagalagadan a mangpataud kadagiti social services, full employment, ken panangingato ti kalidad ti biag para iti amin.
Mainaig iti daytoy, ti nasao a proklamasion ket pinirmaan ni Executive Secretary Lucas Bersamin.
Iti sidong ti Bagong Pilipinas, maitantandudo ti transpormasion iti amin a sektor ken iti gobierno no sadinno agraira ti panagkumbaba ken responsibilidad iti tunggal maysa.
Malaksid iti daytoy, ti Proclamation No. 598 ket naituding ti Philippine Charity Sweepstakes Office a mangidaulo iti pannakarambak ti “National Day of Charity” agraman kadagiti katupag a programa, aktibidad, ken proyekto.
Kabayatanna, naibilinan ti amin nga ahensia ti national gov’t bayat a naparegta dagiti lokal a gobierno, non-gov’t organizations, ken ti pribado a sektor a mangipaay ti naan-anay a suporta iti Philippine Charity Sweepstakes Office ken aktibo a makitinnulong iti National Day of Charity
