LAOAG CITY – Inlawlawag ni Presidente Ferdinand Marcos Jr. ti panangkablaaw na ken ni Chinese President Xi Jinping iti Asia-Pacific Economic Cooperation (APEC) Economic Leaders’ Meeting iti Gyeongju idi Nobyembre 1, 2025.
Basar iti presidente, ti pannakialamano na ket maysa a simple a tignay ti naipagagangay a panangrespeto iti pada a lider ti estado.
Napasamak ti apagbiit interaksyon iti seremonya ti turnover ti Asia-Pacific Economic Cooperation chairmanship manipod iti South Korea agturong iti China, nga isu ti sumaruno nga agbalin nga host ti APEC Summit intono 2026.
Segun ken ni Marcos, inasitgan na ni Xi tapno kablaawan daytoy iti sumaruno a panangidaulo ti China iti APEC, iti baet ti baiget a seguridad ti lider.
Innayon na a ti panangkablaaw na ket paset ti diplomatiko a nakaugalian ken saan a rebbeng nga ikkan ti sabali a kaipapanan kas pormal a panagsarita wenno panagbalbaliw ti posisyon ti Pilipinas.
Ti nasao nga interaksyong ket napasamak iti baet ti agtultuloy a tensyon iti nagbaetan ti Pilipinas ken China mainaig ti isyu iti West Philippine Sea.
Nupay awan ti naikeddeng a bilateral meeting iti nagbaetan ti dua a lider, inpasigurado ni Mrcos nga agtalinaed a silulukat ti Pilipinas iti dayalogo ken kooperasyon iti babaen dagiti maipatpatungpal a pagannurutan ti international law.
Ti APEC 2025 iti Gyeongju ket nakatutuk kadagiti isyu kas ti digital trade, AI governance, ken economic resilience, no sadinno a nagpanawagan dagiti lider ti natibtiber a panagtitinnulong iti baet dagiti panagduduma iti pulitika.
