LAOAG CITY – Inpasigurado ni Presidente Ferdinand Marcos Jr. nga agtultuloy ti pannakaiwaras ti tulong kadagiti biktima ti Severe Tropical Storm Kristine.
Iti situation briefing a naangay iti Malacañang, inbilin ti Presidente kadagiti maseknan nga ahensia ti gobierno nga ituloyda ti relief operation ken doblen da ti aggaraw para kadagiti apektado a lugar.
Inpaganetget ti Presidente a rumbeng laeng a nakasagana ti gobierno para kadagiti sumangbay a weather disturbance.
Kinunana a kanayon a nakatutok ti gobierno iti kasasaad ti panawen tapno masigurado ti dagus a pannakaipatungpal dagiti rescue and relief operations.
Innayon ti Presidente a saan koma a maisardeng ti pannakaiwaras ti tulong nangruna ta adu pay laeng dagiti umili a nagtalinaed kadagiti evacuation centers.
Kabayatanna, inpasigurado ti Presidente a nakasagana ti gobierno a mangsuporta kadagiti biktima ken dagiti apektado a local government units.
