LAOAG CITY – Itrato ni President Ferdinand Marcos Jr. ti aniaman a baro nga impeachment complaint kontra ken ni Vice President Sara Duterte kas ti imbestigasyon iti flood control anomaly.
Daytoy ti inbatad ni Palace Press Officer Undersecretary Claire Castro.
Kuna ni Castro a daytoy ti reaksyon ni Presidente Marcos Jr. iti possible a panangipila ti baro nga impeachment bid ti Makabayan bloc iti sumaruno a bolan apaman nga agngudo ti one-year ban intono Pebrero 6, 2026.
Inlawlawag ni Castro a nalawag ti kayat a sawen ti presidente a no siasinno ti rumbeng a pagsungbaten ket masapol nga agsungbat.
Innayon na a no adda ti ebidensya dagiti agreklamo ken kayat da nga adda ti agsungbat ket mabalin wenno nawaya da nga aramiden ken saan nga agbalin a lapped ti presidente.
Immunan nga inrakurak ni Castro a saan a pakibiangan ni Presidente Marcos ti possible a pannakaipila ti baro nga impeachment complaint kontra ken ni Vice President Duterte.
