LAOAG CITY – Inpasigurado ti Malacañang a nakasagana nga ipublikar ni Presidente Ferdinand Marcos Jr. ti Statement of Assets, Liabilities, and Net Worth wenno SALN-na iti kanito nga ikkatenen ti Office of the Ombudsman dagiti maipatpatungpal a limitasion iti panangala ti kopya daytoy.
Inbatad ni Palace Press Officer Claire Castro, sitatallugod ti Presidente iti aniaman nga addang a makapatibker iti transparency ken panangsungbat iti gobierno.
Inpetteng ni Castro, nakasagana met dagiti amin nga opisial iti ehekutibo nga isubmitir wenno ipakita ti SALN dagitoy no kasapulan.
Maipalagip nga inrakurak ni Ombudsman Jesus Crispin Remulla a mangiparuk-at isuna ita a lawas ti memorandum a mangikkat kadagiti restrictions iti panangala ti SALN dagiti opisial ti gobierno.
Daytoy nga addang ket maibilang a paset ti panangpatibker ti kampania kontra iti korapsion iti baet kadagiti maiwaywayat nga imbestigasion kadagiti nagduduma a proyekto ti gobierno.
