LAOAG CITY – Nangipaay ni Presidente Ferdinand Marcos Jr. iti mensahe kadagiti agtutubo, estudiante, ken nagannak kalpasan ti agsasaruno a trahedia a napasamak iti sumagmamano a pagadalan ditoy pagilian.
Inawagan ti Presidente ti kolektibo a panagtignay tapno masalakniban dagiti agtutubo manipud iti kinaranggas, pannakabaybay-an, ken dadduma pay a peggad. Kinunana a dagiti pagadalan ket rumbeng a lugar a pagadalan, arapaap, ken pagdur-asan, saan a lugar a pakadanagan dagiti nagannak maipapan iti kinatalged dagiti annakda.
Inbilin pay ni Presidente Marcos kadagiti ahensia ti edukasion, pulis, salun-at, ken lokal a gobierno tapno ad-adda a mapapigsa dagiti addang para iti kinatalged dagiti estudiante iti intero a pagilian.
Kabayatanna, pinaregta met ti hepe ehekutibo dagiti nagannak a mangipaay iti panawen, atension, ken pannakaawat kadagiti annakda gapu ta ditoy ti pangrugian ti pudno a proteksion.
Impaganetget pay ti Presidente a saan a pagilasinan ti kinakapuy ti panagkiddaw iti tulong.
