LAOAG CITY – Nagpanawagan ni Presidente Ferdinand Marcos Jr. kadagiti Pilipino a papigsaen ti panagkaykaysa ken pammati kabayatan ti panangngilin ti Semana Santa wenno Holy Week.
Iti mensahe ni Presidente Marcos, ginutigot na ti publiko a mangilatang ti oras tapno aginana ken agreflect, ken patibkeren ti panangisakit ken panagserbi iti pada a tao.
Inpaganetget ti presidente ti sakripisyo ni Hesu Kristo, a kuna na ket pammalagip a ti pudno a kinabanuar ket makita iti sakripisyo , saan a ti kinabileg.
Inallukoy pay ni Presidente Marcos Jr., ti kada Pilipino nga agtalinaed a natibker iti pammati, agtitinnulong iti baet ti pannubok ken agkaykaysa para iti nadurdur-as ken compassionate a “Bagong Pilipinas.”
Inleppas ti presidente ti mensahe na iti panangkablaaw na kadagiti Pilipino ti napnuan kaipapanan ken nagasat a Semana Santa para iti amin.
