LAOAG CITY – Nakasagana ni President Ferdinand Marcos Jr. a mangsango iti alegasyon a maibatbato kontra kenkuana basta adda dagiti maidatag nga ebidensya.
Daytoy ti inbatad ni Palace Press Officer Claire Castro mainaig iti panangkwestyunar ti dati a kaalyado ni Presidente Marcos maipanggep kadagiti proyekto iti Ilocos Norte.
Immunan nga inrakurak ni dati nga Ilocos Sur Gov. Luis “Chavit” Singson a masapol nga iprayoridad ti Independent Commission on Infrastructure nga imbestigaren dagiti flood control projects iti mismo a probinsya ti presidente.
Basar pay ken ni Singson, kaadoan kadagiti flood control projects iti Ilocos Region ket nabalkot ti anomalya gapu ta nagun-od ti Discaya-owned firms.
Inpetteng ni Palace Press Officer Castro a nakasagana ti presidente a mangsungbat kadagiti alegasyon laketdi adda ti maipaay nga ebidensya ken saan a basta agitudo gapu ta ado dagiti opisyal iti Ilocos Norte.
Innayon ni Castro a saan a rumbeng a basta mamati kadagiti alegasyon aglalo no adda dagiti madakamat a nagan ken mangparnuay ti intriga nga awan ti natibker ken kongreto nga ebidensya.
