LAOAG CITY – Saan a makibiang ni Presidente Ferdinand Marcos Jr. iti plano a panangimbestigar iti Dolomite Beach idiay Manila.
Inbatad ni Palace Press Officer Usec. Claire Castro a saan a kumontra ni Presidente Marcos ditoy gapu iti separation of powers.
Nupay kasta, mamati ni Castro a mabalin a makita iti iwayat nga imbestigasion no pudno nga adda ti napasamak nga anomalya ken no adda ti epekto daytoy iti kumarkaro a layos idiay Manila.
Adda met ti sungbat ti Palasyo kadagiti mangibagbaga a diversionary tactics laeng daytoy tapno liklikan ti isyu iti korapsion iti flood control projects.
Iti maikatlo a lawas ti Nobiembre, plano a rugian ti imbestigasion iti Dolomite Beach no daytoy ket maiyataday iti Manila Bay Sustainable Development Master Plan ken sumursurot iti writ of continuing mandamus ti Korte Suprema para iti Manila Bay rehabilitation.
