LAOAG CITY – Saan a pakibiangan ni President Ferdinand Marcos Jr. iti siasinno man nga agpila manen ti impeachment complaint kontra ken ni Vice President Sara Duterte, gapu ta ti kongreso ti addaan ti hurisdiksyon iti daytoy a banag.
Daytoy ti inbatad ni Palace Press Officer Claire Castro.
Ti reaksyon ti Malakanyang ket kalpasan ti rakurak ti Makabayan bloc a nakasagana a mangiyendorsar ti baro nga impeachment bid kontra ken ni Vice President Duterte kalpasan a malpas ti one-year ban nga inpatungpa ti Korte Suprema no sadinno nga agngudo daytoy intono Pebrero ita a tawen.
Nupay kasta, inpaganetget ni Castro a kayat ni Presidente Marcos a dagiti rumbeng a mapagsungbat ket agsungbat.
Maipalagip nga idi Disyembre 2024, uppat nga impeachment complaints ti naipila kontra iti bise presidente.
Ti maikapat a reklamo a nangitunda iti panagimbestigar ti House Good Government and Public Accountability Panel maipanggep iti pannakabusbos ti confidential funds ti Office of the Vice President ken Department of Education, ket inyendorsar ti nasurok a 200 a kongresista idi Pebrero 2025 a nagresulta iti impeachment ni Duterte iti kamara de representantes.
Idi Agosto 2025, ti Senado ket nagbutos iti 19–4, nga addaan iti maysa nga abstension, tapno i-archive dagiti artikulo ti impeachment kalpasan ti pangngeddeng ti Korte Suprema a nangideklarar ti reklamo kas unconstitutional.
