LAOAG CITY – Target ni Presidente Bongbong Marcos Jr. a pirmaan ti ₱6.352 trillion a 2025 national budget inton Disiembre 19, 2024.
Daytoy ti sungbat ni Senate Committee on Finance Chairperson Grace Poe sakbay a naiplastar ti 2025 General Appropriations Bill (GAB) iti bicameral conference committee.
Segun ken ni Poe, sursurotenda pay laeng ti eskediul tapno mapirmaan ni Presidente Marcos ti national fund sakbay ti paskwa.
Mangnamnama ti lehislador a saan nga agbalin a deadlock ti diskusionda maipapan iti badyet ita ta linuktan ti bicameral ti diskusion, ngem inpettengna a nakasaganada iti Senado a dumngeg iti dasig dagiti kongresista mainaig iti badyet.
Innayon ni Poe nga adda dagiti panawen a masapul nga agsakripisio ken silulukatda nga agkompromiso tapno matungpal ti tarigagay a mangipasa iti badyet sakbay ti panagngudo ti tawen.
