LAOAG CITY – Kinarit ni ACT Teachers Party-list Representative Antonio Tinio a saanen nga ibaybayag pay iti panangiruar ti Statements of Assets, Liabilities, and Net Worth wenno SALN da Presidente Ferdinand ‘Bongbong’ Marcos Jr., Vice President Sara Duterte ken sibubukel a gabinete.
Inpetteng ni Tinio, ti panangipakita ti Statements of Assets, Liabilities, and Net Worth ket kas maibasar iti Konstitusion ken kidkiddawen dagiti umili tapno matingiting no agbibiag iti husto, nagtalinaed a napudno iti serbisio ken saan nga agar-aramid ti korapsion dagiti opisial ti gobierno.
Daytoy a karit ni Tinio ket kagiddan iti pannakadismaya iti limitado ken naiget a pagannurotan ti Malakanyang iti pannakaiparuk-at ti Statements of Assets, Liabilities, and Net Worth ti Presidente ken miembro ti gabinete daytoy.
Innayonna a rumrummuar a nalaing laeng nga agsarita ti Malakanyang ngem saanna a kabaelan nga ipublikar ti Statements of Assets, Liabilities, and Net Worth kas paset ti pananglaban iti korapsion ken panangitandudo ti transparency ken accountability.
