LAOAG CITY – Agtultuloy ti search and rescue operations nga isaysayangkat ti Philippine Coast Guard (PCG) para kadagiti biktima ti trahedya ti pannakaarinebneb ti motorbanca nga MBCA Amejara ken ti barko nga MV Devon Bay.
Saan nga agsarsardeng dagiti kameng ti Philippine Coastguard iti panagbiruk kadagiti possible a nakalasat iti dua nga insidente.
Segun ken ni Philippine Coast Guard spokesperson Captain Noemi Cayabyab, kumpirmado a ti lima a bangkay ket ti narekobre manipod iti didigra ti MBCA Amejara.
Kuna na a dagiti natay a biktima ket naikabil da iti Davao City tapno isayangkat ti proseso ti identification ken tapno maamoan ti pakabigbigan dagiti kabagyan da.
Iti pakabuklan a 16 a nakalugan iti nasao a bangka, maysa laeng ti nairekord a nakalasat idinto a 10 pay dagiti agtultuloy a birbiruken dagiti otoridad.
Innayon ni Cayabyab a tapno mapaalisto ti panagbiruk ket maisaysayangkat ti aerial survey iti lugar ti insidente.
Makitintinnulong metten ti Philippine Coast Guard iti nagduduma nga ahensya ti gobierno ken dagiti volunteer groups, karaman ti Philippine Navy, Office of Civil Defense (OCD), dagiti lokal a gobierno (LGU), Philippine National Police (PNP), ken uray dagiti volunteer fisherfolk nga asideg iti lugar.
Basar kadagiti report, nabirukan dagiti bangkay iti kaadayo nga 65 agingga iti 68 nautical miles asideg ti Balut Island.
