LAOAG CITY – Kinumpirmaran ni PO1 wenno Petty Officer First Class Roberto Verdadero ti Substation Commander ti Philippine Coast Guard – Bacarra a passable aminen ti dalan idiay Tuguegarao City, Cagayan.
No pay kasta ket adda dagiti sumagmamano a paset ti nasao a lugar nga in-inot pay laeng nga ages-es-es gapu iti nakaro a layos gubuay iti Bagyo Ulysses.
Segun ken ni PO1 Verdadero, saanen a narigat ti sumrek iti Siudad ti Tuguegarao gapu ta naiwakniten dagiti nakaabbeng kadagiti kalsada tapno makadalyasaten dagiti lugan nga umay mangted ti tulong para kadagiti nagbalin a biktima iti nasao a Bagyo.
Inbatadna nga idi damo nga aldawda idiay Tuguegarao ket agsisinnungbangir dagiti agpaarayat ti tulong kadakuada kas dagiti residente nga agkidkiddaw a maibakwit manipod kadagiti pagtaenganda a nalmesen ti alisto a panagngato ti danum.
Inlawlawagna a saannan a masinunuo no mano dagiti pamilya a natulunganda a ni-rescue iti kangitingitan ti rescue operation gapu ta nagsisinada kadagiti kakaduana a napan nagresponde.
Kunana nga adda pay laeng dagiti nariparna a sumagmamano a residente a matmaturog iti tuktok ti galba ti balayda no pay man bimmaban ti danumen.
Inbagana a daytoy ket gapu ta arigna ket tinilmon ti layos dagiti amin a ramit dagiti umili rason a saan a kaskarina a makaplastarda nga insigida iti dati a situasion.
Innayon ti Substation Commander ti Philippine Coast Guard – Bacarra a saanda pay masinunuo no kasano ti kapaotda pay nga agtalinaed idiay Siudad ti Tuguegarao gapu ta kasapulan met pay laeng ti man power a mapan mangibunong kadagiti relief goods.
Maipalagip a 25 a personnel ti Philippine Coast Guard ditoy probinsia ti nagturong idiay Cagayan tapno tumulong iti rescue operations.
Naammoan a dagiti napan nagresponde a Philippine Coast Guard ket manipod iti Substation ti Bacarra, Currimao, Pasuquin ken iti ili ti Pagudpud.
Iti agdama ket adu pay laeng a pagtaengan ti saan pay nagsubli ti serbisio ti kuryente ken narigat pay laeng ti internet access connection.
