LAOAG CITY – Kalikagom ti Persons with Disability Affairs Office ditoy ciudad ti Laoag ti pannakaipatungpal ti programa a Vocational rehab wenno vocational training para kadagiti addaan ti rangkap ti bagi ditoy ciudad.
Daytoy ti inpakaammo ni Mr. Christoper King Medina, Disability Affairs Officer 4 ti Persons with Disability Affairs Office ditoy ciudad ti Laoag.
Segun kenkuana, napintas ti programa gapu ta ado dagiti Persons with Disability a kalpasan ti panagturpos da iti sekondarya ket awanen iti papanan da wenno agtalinaed da metlaeng iti babbalay da.
Kunana a babaen ti vocational training ket adda iti a masursuro da a basic trainings ken makatulong tapno makabirok dagitoy iti bukod da a trabaho .
Inbatadna a babaen iti naiget a koordinasyon ti opisina da ken ti City Social Welfare and Development Office ket manamnama a maipatungpal ti programa para iti pagsayaatan dagiti addaan ti rangkap ti bagi ditoy ciudad.
Innayon ni Medina a ti kangrunaan a gagem da ket ti mangiyam-anmo iti publiko a dagiti adda rangkap ti bagina ket addaan ti karbengan a kas met laeng kadagiti gagangay nga umili.
