LAOAG CITY – Pinalagipan ti Provincial Environment and Natural Resources dagiti Local Government Unit a plastaren wenno urnosen da ti sanitary landfill nangruna ita a panawen ti panagtutudo.
Kuna ni Mr. Victor Dabalos, mangidadaulo iti Provincial Environment and Natural Resources, kasapulan a masurot ti proper waste segregation tapno saan nga agbalin a problema dagiti umili, ken possible a pakaalaan ti sakit babaen iti saan a makaay-ayo nga angot.
Mainaig iti daytoy, inpakaammo ni Dabalos nga agtultuloy pay laeng ti pannakaaramid dagiti sumagmamano a sanitary landfill ditoy probinsia.
Kunana a dagiti lokal a gobierno nga awanan pay wenno manarimaan ti panagpaaramid da ti sanitary landfill ket iti ili ti Marcos, Solsona, Dumalneg ken Adams.
Kabayatanna, inbatad ni Dabalos a sumaruno met ti pannakaipasdek ti Paoay Sanitary landfill idinto nga awan pay iti ili ti Pagudpud.
Immunan nga inpakaammo ni Dabalos kadagiti nagduduma a lokal a gobierno ti kinapateg ti landfill tapno saanen a kasapulan pay nga agturong kadagiti kabangibang nga ili tapno agibelleng ti basura da.
