LAOAG CITY – Inbatad ni Mr. Victor Dabalos, ti mangidadaulo iti Provincial Environment and Natural Resources nga adda dagiti napagsasaritaan da nga addang tapno malapdan dagiti possible a mapasamak a forest fire iti nagduduma nga ili ditoy probinsya.
Inlawlawag na a ti maysa a patien da a makatulong tapno maliklikan ti forest fire ket ti pannakaiwaras ti ad-ado a tao da kadagiti kabanbantayan.
Kuna na nga iti napalabas a tawen ket naestablisar dan dagiti lugar a masansan a pakapaspasamakan ti forest fire isut gapuna dagitoy ti kangrunaan a mabantayan.
Innayon na nga adda met ti inted da nga assignment dagiti local a gobierno no sadinno a masapol a bigbigen da dagiti indibidual a possible nga agpuur kadagiti kabanbantayan.
Mainaig iti daytoy, kuna ni Dabalos a kabisado dan ti rason no apay nga adda dagiti agpupuur kadagiti kabanbantayan, daytoy ket tapno napinpintas ti panagtubo dagiti baro a root nga isu ti paggugusto a kanen dagiti taraken nga ayop, ken ti panaganop.
Immunan nga inrakurak ni Naragsak nga inpakaammo ni F/Supt. Roxanne Parado, Provincial Fire Marshal ti Bureau of Fire Protection ditoy Ilocos Norte a bimmaba ti bilang dagiti nairekord a grassfire ken forest fire ditoy Ilocos Norte idi 2025.
Segun kenkuana, basar iti datosda ket adda ti 82 a nairekordda a grassfire ken forest fire idi 2023, 41 idi 2024 ken 8 idi 2025.
Inbatadna a nagun-od daytoy a balligi babaen ti naiget a panagbibinnulig ti Task Force Ilocos Norte Fire Fighting Group a bukbuklen ti Bureau of Fire Protection, Philippine National Police, Philippine Marines, Philippine Army, Department of Environment and Natural Resources, City ken Municipal Disaster Risk Reduction and Management Office, Local Government Units, Barangay Ranger Officers ken dagiti barangay officials.
