LAOAG CITY – Inlawlawag ni Fire Supt. Floro Obrero, ti provincial fire marshall ti Bureau of Fire Protection (BFP) ditoy Ilocos Norte a negatibo amin ti resulta ti swab test dagiti personnel ti Pasuquin Fire Station.
Ummuna iti daytoy, adda ti personnel iti BFP-Pasuquin ti nagawid ditoy probinsya manipud iti ciudad ti Tuguegarao ken dagus a na-isolate ken idi dimmalan iti swab test ti positibo iti virus.
Inbatad na nga apaman a nakasangpet ti maseknan ditoy probinsya ket saan a simsimrek iti BFP station ngem nag-isolate latta dagiti katrabahoan na kas panangsurot iti protocol.
Kunana a dimmalan dagitoy iti RT-PCR test idi Abril 21 ken negatibo da amin iti virus ngem masapol nga ileppas da ti 14-day quarantine da.
Kunana nga iti agdama ket awan ti transaksyon a maiyuswat iti stasyon ti BFP-Pasuquin ngem no adda ti mapasamak nga uram ket mabalin da a makaresponde gapo ta open area met ken awan unay ti tao.
