LAOAG CITY – Itultuloy ti Public Employment Service Office ti mapan agsursor kadagiti nagduduma a pagadalan ditoy siudad ti Laoag para iti career coaching program.
Daytoy ti inpakaammo ni Ms. Shey Pia Abaya, Assistant Manager iti nasao a pangopisinaan.
Inbatadna a nalpasdan a binisita dagiti sumagmamano a pagadalan ditoy siudad kas iti Balatong Integrated School, Caoacan National High School ken dadduma pay.
Mainaig iti daytoy, kuna ni Abaya a daytoy a programa ket maysa a pammilin ti Public Employment Service Office a kasapulan a maisayangkat kadagiti pagadalan a mangididiaya iti Grade 10 ken Grade 12.
Innayonna nga agtultuloy daytoy nga aramiden ti opisinada tapno makatulong kadagiti agad-adal a mapagdesisionan a nasayaat ti alaenda a kurso inton kolehio.
