LAOAG CITY – Kiniddaw ti Public Employment Service Office ditoy ciudad ti Laoag kadagiti Overseas Filipino Workers nga agturong iti opisina da tapno agparehistro.
Segun ken ni Miss Shey Pia Abaya, ti Assistant Manager iti Public Employment Service Office ditoy ciudad ti Laoag, amin nga Overseas Filipino Worker, miembro man wenno saan iti aniaman nga asosasyon ket masapol a mapan da agparehistro iti opisina da.
Inlawlawag na a kalikagom da a maaddaan ti datos kadagiti amin nga Overseas Filipino Workers manipod ditoy ciudad ti Laoag tapno adda ti pangalaan da a dagus no kasapulan ti nagduduma nga ahensiya ti gobierno kas ti Department of Migrant Workers ken ti Overseas Workers Welfare Administration.
Innayon na a no adda pay ti ipaay a tulong ti gobierno ket sigurado a maipaayan amin dagiti maseknan nga Overseas Filipino Workers.
