LAOAG CITY – Rinugyanen ti Public Employment Service Office (PESO) ti napan bimmisita kadagiti nagduduma a pagadalan dtoy ciudad ti Laoag tapno tulongan dagiti agad-adal nga agpili ti career wenno ti kayatda a pagbalinan iti masangwanan.
Daytoy ti inpakaammo ni Ms. Shey Pia Abaya, ti Assistant Manager ti Public Employment Service Office ditoy ciudad ti Laoag.
Kunana nga immuna a nagturong da iti Balatong Integrated High School ken ditoy nga insayangkat da ti Career Development Support Program.
Inlawalawag na a babaen ti nasao a programa ket matulongan dagiti estudyante nga agpili ti trabaho wenno career a kayatda nga ipursige ken pagbalinan iti masangwanan.
Inbatad na a ditoy a maipakaammo kadakwada dagiti trabaho a narigat a paserkan ken dagiti in-demand a trabaho kadagitoy a panawen.
Segun kenni Abaya, ti Career Development Support Program ket pagbinbinnuligan ti Public Employment Service Office ken Department of Education ditoy ciudad.
Innayon na a dagiti kangrunaan a pagadalan a target da a pagturongan ket dagiti mangididiaya ti grade 10 ken grade 12.
Inbatad na pay a ti usaren da a modules ket insagana ti Department of Labor and Employment.
