LAOAG CITY – Inadmitir ti Provincial Government of Ilocos Norte a kasapulanda ti sponsor para iti napinpintas a pannakaisayangkat ti Palarong Pambansa ditoy probinsia.
Segun iti Gobernador, dakkel ti magastos ti agbalin nga host kadagiti dadakkel nga aktibidad kas ti nasao nga aktibidad.
Gapu iti daytoy, nagpanawagan kadagiti umili a no adda dagiti am-ammoda a mabalin a makatulong wenno mangipaay kadagiti usaren dagiti atleta a maturog, sports drinks pakairamanan dagiti aircon ken electric fan.
Inpasigurado ti Gobernador a no maipanggep iti seguridad dagiti atleta ket nakasaganan ti probinsia.
Malaksid iti daytoy, agbalin nga aktibo ti Metro Ilocos Norte Council a tumulong a mangkita iti napintas a panagannayas ti trapiko ken ti pannakaipasigurado nga awan dagiti pampasahero a lugan nga agsingir ti nangina kadagiti mailugan dagitoy a pasahero.
Kabayatanna, naminduan a daras a bimmisita ti mangidadaulo ti Management Committee ken Secretary General ti Palarong Pambansa ditoy probinsia tapno siguradoen ti panagsagsagana ti gobierno probinsial nangruna ti pannakaipinal dagiti lugar a pagianan dagiti atleta ken pakaisayangkatan dagiti ay-ayam.
