LAOAG CITY – Makidanggay ti Provincial Government of Ilocos Norte (PGIN) babaen iti Provincial Social Welfare and Development Office iti selebrasyon ti National Disability Prevention and Rehabilitation wenno NDPR Week iti maikatlo a lawas iti daytoy a bulan ti Hulio.
Inlawlawag ni Mrs. Carolyn Domingo, Disability Affairs Officer 1 ti Provincial Social Welfare and Development Office, a maisayangkat ti aktibidad ditoy probinsia inton Hulio 23.
Segun kenkuana, ti kangrunaan a gagem ti selebrasyon ket ti maipaka-ammu iti publiko a dagiti adda rangkap ti bagina nga umili ket kas met laeng kadagiti gagangay nga umili.
Mainaig iti daytoy, inbunannagna nga adda ti maisayangkat a lecture mainaig iti karbengan dagiti adda rangkap ti bagi na.
Imbatadna a maysa nga agpapaay iti Department of Interior and Local Government ti mangilawlawag iti pagalagadan iti “coordination mechanism” dagiti Persons with Disability Affairs Office ken ti Local Social Welfare and Development Office iti pannakaipatungpal dagiti programa ken serbisyo para kadagiti adda rangkap ti bagi na.
Inpakaammo ni Domingo a dagiti partisipantes ket manipud kadagiti 21 nga ili ken dua a siudad manipud iti Municipal/City Social Welfare Office, Persons With Disability Affairs Officeken dagiti PWD Municipal/City Chapter President.
Kabayatanna, inbatadna a ti maysa kadagiti kangrunaan a paset ti selebrasyon ket ti pannakaipaay ti “cash assistance” nga aggatad ti lima ribu a pisos kadagiti “blind learners” wenno dagiti agbasbasa a bulsek nga opisial a ka-enrol iti Special Education School.
