LAOAG CITY – Paigetan ti gobierno probinsial ti Ilocos Norte wenno PGIN ti panagbakuna kadagiti umili.
Segun ken ni Dr. Medeldorf Gaoat, chairman ti Committee on Health ti Sangguniang Panlalawigan, daytoy ti maysa kadagiti napagsaritaanda ken ni Provincial Health Officer Dr. Rickson Balalio.
Inlawlawagna a kiniddawda kadagiti amin a Local Government Units ditoy probinsia kangrunaanna kadagiti Rural Health Units wenno RHU ti panagturongda kadagiti nagduduma a barangay a masakupan.
Inbatadna a napintas daytoy nga addang a dakkel a tulong iti pananglapped a maapektaran iti sakit.
Inbunannagna a maipangpangruna a mapabakunaan dagiti maladaga a kaipasngay agingga iti lima a bulan.
Innayonna a karaman pay ditoy ti bakuna kontra polio kasta metten ti bakuna kontra iti kamuras ken dadduma pay.
