LAOAG CITY – Pimmasa iti Seal of Good Local Governance (SGLG) ita a tawen 2024 ti Provincial Government of Ilocos Norte (PGIN).
Segun ken ni Engr. Pedro Agcaoili Jr., Provincial Planning and Development Officer, daytoy ti maikapat a daras nga “awardee” ti Provincial Government of Ilocos Norte iti Seal of Good Local Governance a tinawen nga isaysayangkat ti Department of the Interior and Local Government (DILG) malaksid laeng idi panawen ti pandemia.
Inbatadna a daytoy ti maikadua a pimmasa ti Provincial Government of Ilocos Norte iti Seal of Good Local Governance kalpasan ti pito a tawen agsipud ta ti kaunaan ket idi tawen 2015 ken naudi idi tawen 2016.
Pinasingkedanna a narigat a maipatungpal dagiti “requirements” gapu ta sangapulo amin nga “areas” wenno benneg dagiti imonmonitor dagiti maseknan.
Kunana a karaman ditoy ti finance, resiliency wenno disaster preparedness, social protection, salun-at, edukasyon, business friendliness, peace and order and public safety, aglawlaw, turismo ken kultura ken dagiti agtutubo.
Kabayatanna, malaksid iti gobierno probinsial, nakaawat met dagiti ili ti Bacarra, Marcos, Dingras, Nueva Era, Pinili, San Nicolas, Solsona ken Vintar iti SGLG awards iti babaen iti municipal categories.
