LAOAG CITY – Mannarimaan ti panagsagsagana ti Philippine Army iti pannakaisayangkat ti Dawn Caracha Exercise 2024 ditoy Ilocos Norte ita a bulan ti Nobiembre.
Kagiddan iti daytoy ket ti pannakaipasa iti maikadwa ken maudi a panakaibasa ti Draft Provincial Resolution No. 2024-10-368 kabayatan t regular session no sadinno a kalikagom ti Sang. Panlalawigan nga ipakaammu kadagiti umili a saan a pagamkan ti nasao a military exercise.
Ti Dawn Caracha Millitary Exercise 2024 ket pakipagpasetan dagiti militar manipud Australia ken dagiti militar ditoy pagilyan.
Segun ken ni Sang. Panlalawigan Gian Carlo Crisostomo, ti chairman ti comittee on peace and order, kasapulan a maipakaamo iti publiko daytoy nga aktibidad tapno saan nga pamunganayan ti panakaalarma dagiti umili.
Maipalagip nga immun-unan nga inpakaamo ti Philippine Army nga adda maiwayat a Dawn Caracha Exercise 2024 ditoy Ilocos Norte ita a bulan ti Nobiembre.
Mainaig iti daytoy, nangrugin a nagsagana ti Philippine Army idi Nobiembre 1, ken intun Nobiembre 9 manamnama a sumangpet ditoy probinsya dagiti 111 a militar, 81 manipod iti Philippine Army ken 30 manipod iti Australian Defense Forces.
Apaman a makasangpet da ket agturong da inton Nobiembre 11 iti ili ti Pagudpud, idinto a pormal a mangrugi tin exercise intun Nobiembre 11-21 a maangay iti ili ti Bangui ken Pagudpud.
Manamnama a maiwayat ditoy land, firing, air ken maritime exercise no sadinno nga adda dagiti mausar nga equipments ti pagilian ken iti Australian Defence Forces.
Kabayatanna, inpasigurado ti Philippine Army a ti maangay a Millitary Exercise ket awan pakainaigan na iti agdama a sitwasyon iti West Philippine Sea ken daytoy ket nakasentro laeng iti panagsagana ti pagilyan kadagiti pangta ti suguridad ti pagilian.
