LAOAG CITY – Awan pay ti komento ti Armed Forces of the Philippines ken ti Philippine Marine Corps iti rakurak ni dati a Cong. Mike Defensor a ni Orly Guteza ket adda iti proteksyon ti Philippine Marines.
Ni Defensor ti nangiyasideg kenni Guteza kenni Sen. Rodante Marcoleta ken nabigbig kas surprise witness a nagtestigo iti Senate Blue Ribbon committee mainaig iti isyu ti flood control.
Segun kenni Defensor adda ni Guteza ket adda iti Philippine Marines ken nakasagana nga agpakita no paayaban ti Senado, Department of Justice (DOJ) wenno ti National Bureau of Investigation (NBI).
Inbatad na nga awan ti makaasideg ken makasarita kenni Guteza ken no addan to ti official summons, maipatulod daytoy iti Marine commandant.
Inlawlawag pay ni Defensor ti saan a panagpakita ni Guteza iti NBI no sadinno kunana nga adda ti inisyal a saritaan a maipan iti babaen ti witness protection program ngem mas pinili ti maseknan ti mangala ti proteksyon iti Marines.
Inulit manen ni Defensor nga agibagbaga ti pudno ni Guteza mainaig iti panangideliver na ti kwarta iti pagtaengan ni dati a Cong. Zaldy Co ken Rep. Martin Romualdez.
