LAOAG CITY – Inbatad ti National Police (PNP) a mangipila da pay ti nayuna a kaso kontra ken ni Vice President Sara Duterte ken sumagmamano pay nga indibidual.
Daytoy ket kalpasan kadagiti reklamo a direct assault, disobedience, ken grave coercion nga inpila ti nailian a pulisya kontra ken ni Vice President Sara.
Inbatad ni Philippine National Police spokesperson Police Brigadier General Jean Fajardo nga inpila da dagiti inisyal a reklamo kontra kada Duterte, Vice Presidential Security and Protection Group (VPSPG) head Colonel Raymund Dante Lachica, ken dadduma pay a John Does seknan kadagiti napasamak a riribok idi naaddaan ti problema ti salun-at ni Atty. Zuleika Lopez kabayatan a nakabalud iti kamara de representantes.
Saanen nga indetalye ni Fajardo dagiti nayun a kaso nga ipila da kontra iti Bise Presidente.
Iti agdama ket awan pay ti komento ti Office of the Vice President (OVP) seknan iti plano ti Philippine National Police.
