LAOAG CITY – Immapela iti publiko ni Philippine National Police (PNP) Chief Gen. Rommel Francisco Marbil nga agannad iti panagaramid ti damag ken iti pangpost iti online kangrunaan na no maipanggep kadagiti krimen ken insidente nga adda ti pakainaigan iti trabaho da tapno maliklikan ti negative public perception.
Kuna ni Marbil, iti baet ti 26.76% a panagbaba iti crime rate ti pagilian sipud idi Enero, makaaw-awat paylaeng ti opisina da kadagiti concerns maipanggep iti kinatalged ken seguridad iti intero a pagilian nga ikonkonektar na iti alisto a panagwaras ti crime-related contents iti social media platforms.
Mabalin a pangrugyan daytoy dagiti reports nga uray agtultuloy ti panagbaba ti crime rates ti Pilipinas ket agparparang nga ad-adda a kumarkaro gapu ti isyu ti selective reporting nga inadmitir ti hepe a maysa a global issue.
Gapu iti daytoy, nangdutuk ni Marbil ti nayun a police units iti nagduduma a paset ti pagilian tapno agbalin a natalged dagiti komunidad ken ad-adda a maikkan ti pamalpalatpatan ti publiko maipanggep iti crime prevention ken law enforcement.
Ginutigot pay ti hepe ti nailian a pulisya nga agtultuloy nga iwaras dagiti positibo a developments kas kadagiti naimballigian nga operasyon ken uray dagiti public safety initiatives dagitoy ken dagiti crime reports tapno makaipaay ti komprehensibo a panangiladawan ti security landscape iti pagilian.
