LAOAG CITY – Agtultuloy ti panagimbestigar ti Philippine National Police (PNP) kadagiti 24 a nagserbi a hepe ti nailyan a pulisya no adda kadakuada ti mapapati a nakaawat iti binulan a payroll manipud iti operasion ti Philippine Offshore Gaming Operators (POGO).
Daytoy ti inpakaammu ti hepe ti Philippine National Police, ni Gen. Rommel Marbil bayat ti panagsukimat ti Senado iti funding proposal ti ahensiada.
Segun kenni Marbil, saanda a naragsak iti impalgak ni Philippine Amusement and Gaming Corporation (PAGCOR) Senior Vice President for Security Retired General Raul Villanueva, nangruna iti babaen ti sapata bayat ti hearing ti Senate Committee on Women and Children.
Kinunana a kasapulan a lawlawagan ni Villanueva daytoy agsipud ta saan laeng a ti sibubukel a ranggo ti Philippine National Police ti apektaranna no di pay ket ti talna ken urnos ti organisasion.
Agingga ita kunana nga awan pay ti naawat da a report manipud kenni Villanueva ngem agsurat da iti opisyal tapno kiddawenna ti nagan ti mapapati a hepe ti Philippine National Police a nakaawat ti payroll manipud iti operasyon ti Philippine Offshore Gaming Operators
Kabayatanna, iti ambush interview kinuna ni Local Government Secretary Benhur Abalos nga awan ti ammona maipapan iti inbutaktak ni Villanueva.
Kinunana a saan pay a nakasarita ni Presidente Ferdinand Marcos Jr. maipapan iti isyu.
Nupay kasta, kalikagom ni Abalos a maammuan no sinno ti tuktukoyen ni Villanueva a dati a hepe ti pulisya nga adda pakainaigan na iti ilegal nga operasyon ti Philippine Offshore Gaming Operators.
