LAOAG CITY – Linawlawagan ni Police Captain Ashley Cacayorin, ti Deputy Chief of Police ti Philippine National Police iti ili ti San Nicolas ti isyu seknan iti panagiserrek ti baboy iti ili da.
Daytoy ket kalpasan nga adda ti naidanon nga impormasyon ditoy Bombo Radyo Laoag a maipagarop nga awan ti permit ti naiserrek a baboy iti ili ti San Nicolas.
Naamoan a dagiti 11 a baboy ket maipan kuma kenni Mr. Jefer Corpuz iti Barangay 14 iti nasao nga ili.
Segun kenni Cacayorin, addaan ti dokumento ngem adda ti ordinansa ti lokal a gobierno a maipawil ti agiserrek uray kumpleto ti dokumento na.
Gapo iti daytoy, inbatad na a naisubli iti ili ti Pasuquin dagiti baboy.
Mainaig iti daytoy, kunana nga adda pay ti sabali a naiserrek a burias iti ili ti San Nicolas ken nakadanon a mismo iti saan nan nga innaganan a partidor iti Barangay 6.
Dinakamat na a dagiti burias ket mataraken ken no dumakkel ket isunto ti pannakaparti na.
Inpetteng na nga awan ti permit dagiti naiserrek a baboy isut gapo na a naisubli met laeng iti ili ti Pasuquin ken mamulta ti mismo a nagiserrek ken ti partidor ken saan a mapilaan ti kaso.
Innayon met ni Dr. Loida Valenzuela, ti Provincial Veterinarian a naipadanon kenkuana daytoy a banag ngem ti pinal a desisyon ket aggapo iti Municipal Agriculture Office.
Kabayatanna, naglikudan ni Corpuz a nagparti ti baboy iti mismo nga arubayan na, a maysa pay kadagiti maiparit nga aramiden gapo ta ti laeng mabalin a pakapartian dagiti baboy ket iti slaughter house.
