LAOAG CITY – Nagpalagip manen ti Philippine National Police (PNP) kadagiti police officers mainaig iti one-strike policy kontra iti indiscriminate firing sakbay ti panangsarabo ti baro a tawen.
Iti statement, inbatad ni PNP acting chief Lieutenant General Jose Melencio Nartatez Jr. a ti one-strike policy ket paset ti napaigetn a security measures ti nailian a pulisya ita nga holiday season.
Inpetteng ni Nartatez a masapol nga amin a PNP personnel ket obserbaren da ti kangatoan a lebel ti disiplina ken professionalism iti panagiggem ti paltog.
Nagballaag nga aniaman nga act of reckless wenno celebratory gunfire ket seryoso a panaglabsing iti duty ken saan a mai-tolerate iti aniaman a sitwasyon.
Inpalgak ni Nartatez a dagiti police officers a mapaneknekan a guilty ti indiscriminate firing ket sumango a dagus ti administrative sanctions ken criminal liability kas maiyataday iti linteg ken awanen ti maipaay a ballaag wenno maikadwa a gundaway.
Innayon na a karaman pay a maipataw a pannusa kadagiti pulis a mapaneknekan a nag-indiscriminate firing ket ti pannakaikkat da iti serbisyo ken mapilaan ti maiyannatop a kaso kriminal.
Kabayatanna, nagpanawagan ni Nartatez kadagiti police officers nga agbalin nga ehemplo iti responsibilidad ken liklikan ti mairaman iti indiscriminate firing usar ti bukod da a paltog kabayatan ti panangsarabo ti baro a tawen.
