LAOAG CITY – Naka-high alert sipud idi Marso 29 agingga iti Abril 5 ti Philippine Red Cross (PRC) kas panagsagsagana iti panagdudupudop ti minilyon a Pilipino nga agbiahe ita nga Holy Week.
Basar iti Philippine Red Cross, gagem daytoy a masigurado ti kinatalged ti publiko idinto a naruay a tattao ti agturturong kadagiti probinsia, pilgrimage sites ken tourist destinations iti baet ti manamnama a panagsisinnelsel iti terminal, kalsada ken dadduma pay a transport hubs.
Nangi-deploy ti Philippine Red Cross ti 2,224 personnel iti intero a pagilian pakairamanan ti 1,887 volunteers ken 337 staff a naka-assign kadagiti lugar nga adu ti tattao kas ti highways, terminals, simbaan, airport, seaport ken tourist spots.
Nangestablisar ti organisasion ti 296 a first aid stations ken 113 a welfare desks para iti alisto a tulong kadagiti agkasapulan ti medikal nga atension wenno makapaspasar ti bannog ken distress.
Nakasagana met ti 71 nga ambulansia, 110 foot patrol teams, 71 roving mobile units ken 15 emergency vehicles a naka-deploy kadagiti critical areas.
