LAOAG CITY – Nagballaag ti Philippine Postal Corporation (PHLPost) iti publiko mainaig dagiti maiwarwaras a peke a text message wenno ‘smishing’ nga agus-usar iti nagan ti ahensia tapno mangallilaw wenno agtakaw dagiti personal ken pinansial nga impormasion.
Basar iti PHLPost, gagangay nga ag-send dagiti scammer ti mensahe nga addaan ti suspicious link no sadinno maibagbaga nga adda problema iti delivery ti parcel gapu iti kinakurang ti address wenno kasapulan agbayad ti “redelivery fee” usar ti credit wenno debit card.
Naiget nga inlawlawag ti ahensia nga saan nga aggapu kadagitoy ti nadakamat a mensahe ken saanda a pulos dumaw-dawat dagiti sensitibo a detalye kas ti bank account numbers ken card information, passwords ken one-time passwords (OTPs) iti babaen laeng ti text message.
Binalakadan ti publiko a saan nga i-click dagiti suspicious link, saan a mangipaay ti personal wenno banking information, saan nga agbayad kadagiti saan a beripikado a website ken tingitingen umuna ti naggapuan ken kinapudno ti tunggal mensahe a maaw-awat sakbay agaramid ti aniaman nga aksion.
Para iti lehitimo a panag-track ken panangberipikar ti parcel, urasaen laeng ti opisial a website ti PHLPost ken dagiti authorized channels.
Mainaig iti daytoy, agtultuloy ti panawagan ti ahensia iti amin nga agtalinaed a naridam ken alerto kadagiti maaw-awat a text, email ken mensahe iti social media.
