LAOAG CITY – Inpasigurado ni Dr. Rickson Balalio, ti mangidadaulo iti Provincial Health Office nga adda ti supply ti anti-rabies vaccine a para ti tao a maipaay kadagiti animal bite center ditoy probinsia.
Kunana a no adda ti emergency nga agkasapulan ket insigida nga adda ti maipaay gapu ta gimmatang da ti 2,000 a doses iti daytoy.
Nupay kasta, inadmitir na a ti laeng umuna a shot ti maipaay a libre ken ti sumaruno ket masapol a gatangen ti pasyente.
Mainaig iti daytoy, inbatad na nga ar-aramiden da a amin a kabaelan da tapnu manayunan ti supply babaen ti panagkiddaw da iti Department of Health- Region 1 ken panagprocure dagiti Local Government Unit.
Kabayatanna, naamoan nga umad-ado dagiti kaso ti animal bite ngem awan pay ti nairekord a nagpositibo ti human rabies a kas iti napalabas a tawen.
