LAOAG CITY – Inruar ti prosekusion ti dokumento a mangipakita ti P70,000 a bayad ken ni Mary Grace Piattos para iti ‘Payment of Reward’.
Segun iti rakurak ni dati a Commision on Audit (COA) state auditor Roderick Wamil a karaman daytoy kadagiti acknowledgement receipts a tiningitingna mainaig ti P125M a confidential funds ti Office of the Vice President (OVP) para iti Disiembre 21-31, 2022.
Inlawlawag ni Wamil a saanda a masinunuo no daytoy ket ‘rewards’ ti mismo nga agas wenno sabali pay a banag, isut gapu na a nagkiddawda pay ti kanayonan a dokumento manipud iti OVP.
Malaksid iti daytoy, naipakita pay ti maysa nga acknowledgement receipt a naglaon ti P110,000 a bayad ken ni Renan Piattos para iti ‘Purchase of Information’.
Nupay kasta ti petsa ti dokumento ket Disiembre 2023, a saan a karaman ti cash advance ti OVP para iti Disiembre 2022.
Nagbalin a kontrobersial ti nagan ni Mary Grace Piattos kalpasan daytoy a maibilang kas fictitious gapu ta nagan daytoy ti maysa a sikat a local restaurant.
Segun iti Philippine Statistics Authority (PSA), awan ti nakita da a birth, marriage, wenno death record iti nasao a nagan.
Impetteng met ti kampo ni Duterte a mabalin daytoy a pseudonym laeng tapno maprotehiran ti umno a kinasiasinno ti nangawat ti pundo.
Inbatad met ti prosekusion a mabalin da nga paayaban ni Mary Grace Piattos kas testigo iti sumaruno nga aldaw ti panangusig no sadinno a nakadependar iti taray ti trial.
Kabayatanna, naiget a naglikudan ti depensa a saanda nga ammo ti nagan a Piattos ken saanda a kayat ti mangipaay ti sayangguseng mainaig iti daytoy.
