LAOAG CITY – Natnag ken nagbaliktad ti maysa a pick up iti kapagayan iti Barangay Pasiocan iti ili ti Bacarra.
Segun ken ni P/Lt. Wilson Sahagun, Hepe ti Bacarra Municipal Police Station, adda ti 13 nga indibidual ti nakalugan iti Mitsubishi Estrada no sadinno a pito iti uneg ken innem ti adda iti likud.
Inbatadna a basar iti inwayatda nga imbestigasion, kabayatan a dumaldalyasat ti pick up nga agturong nga agpa-laud ket apaman a nakadanon iti kurbaan a paset ti kalsada ket napukawan ti kontrol ti manibela a nangitunda ti panagderderetsona agingga a natnag ken nagbaliktad dagitoy.
Inlawlawagna a naggapu iti maysa a pagiinoman ti grupo dagiti indibidual.
Innayonna nga adda ti dua nga indibidual ti naitaray iti Black Nazarene Hospital iti ili ti San Nicolas ken ti dua pay ket iti Gov. Roque B. Ablan Sr. Memorial Hospital ditoy siudad ti Laoag a maysa kadagitoy ket natukkol ti sakana.
