LAOAG CITY – Nagkamang iti Bombo Radyo Laoag ti maysa a residente iti ili ti Piddig tapno ireklamo ti maipagarop a madi a serbisyo a maipapaay iti Piddig District Hospital.
Segun iti complainant, iti alas-tres ti parbangon iti Abril 16 ket intaray da ti maysa a kameng ti pamilya gapo ta marigatan nga aganges ken basar kenkuana ket arig na agngangabit ti biag nan.
Inbatad na nga idi nakadanaon da iti nakadamat nga ospital ket maipagarop nga awan a pulos ti nangasistir kadakuada rason a kiniddaw na kadagiti maseknan a maiyakar laengen ti pasyente iiti sabali nga ospital babaen iti ambulansya a nakaparking iti dayta a gundaway.
Nupay kasta, rumrumuar a ti inbaga dagiti staff ti ospital ket adda ti nagpareserba a mangusar iti ambulansya ken isu ti ur-urayen da.
Gapo iti daytoy, kunana nga inuray da agingga nga adda ti available nga ambulansya ngem idi naitaray ti pasyente da iti alas-otso iti bigat ket naideklara a dead on arrival ti maseknan.
Mainaig iti daytoy, desidido met ti nasao a pamilya a mangipila ti reklamo ken kalikagom da a saanen a maulit ti kastoy a pasamak.
Kabayatanna, ikarkarigatan met ti Bombo Radyo Laoag nga alaen ti takder ti Piddig District Hospital nangnangruna kenni Dr. Chona Stella Rabang ngem agpapan ita a gundaway ket awan pay ti sungbat da.
