Inwaragawag ti Department of Health (DOH) a malaksid kadagiti nurse ket agkurkurang ti pagilian ti dentista.
Segun kenni Health Secretary Ted Herbosa, daytoy ti rason no apay a narigat ti panangipaay ti gobierno iti access iti dental services para kadagiti marigrigat.
Segun kenkuana, adda laeng dua a dental schools a kukua ti gobierno ditoy pagilian, nga isu ti University of the Philippines ken Western Visayas State University.
Innayon ni Herbosa a nangina ti pannakaibangon ti dental school gapu ta minilion a pisos ti magastos iti dental equipment kas iti dental chair.
Nupay adda dagiti pribado nga eskuelaan ti dental iti pagilian, kaaduan kadagiti nagturpos ket agtartrabaho iti pribado a sektor.
Gapu iti daytoy, inbilin ni Herbosa ti pannakaadal manen ti national dental health service law para iti posible a pannakaingato ti sueldo dagiti dentista ti gobierno ken pannakaipasdek ti public-private partnership iti Philippine Dental Association.
