LAOAG CITY – Gimmatang ti Pilipinas ti sumurok-kumurang 1.5 milyon a bariles ti crude oil manipud idiay Russia, basar iti datos ti London Stock Exchange Group (LSEG), iti baet ti ngumatngato a demand iti Asya ken kinakurang iti global supply.
Naipakita ti datos ti London Stock Exchange Group a dua a cargo ti ESPO Blend ti Russia ti naipatulod iti pagilian, pakairamanan dagiti shipment nga inpatulod dagiti tanker a Sara Sky ken Tiger Wings nga agpada a nangibaba ti kargamento iti Limay port idiay Bataan no sadinno a masarakan ti refinery terminal.
Immunan a naipadamag a 700,000 bariles a kargamento manipud iti Sara Sky ngem kinumpirmaran ti nayon a datos ti maysa pay a shipment a nagkarga ti pakabuklan a 1.5 milyon a bariles.
