LAOAG CITY – Nangiwayat ti joint air patrols ti Philippine Air Force ken counterpart daytoy iti Estados Unidos a Pacific Air Forces (PACAF) iti tangatang iti pagin-innagawan a teritorio iti West Philippine Sea (WPS).
Daytoy ti umuna iti babaen ti baro nga administrasion ni United States President Donald Trump.
Inbatad ni Col. Ma. Consuelo Castillo, Spokesperson ti Philippine Air Force, ti air forces ti Pilipinas ken Estados Unidos ket nangiwayat ti bilateral bomber air patrol, air intercept training ken photo exercise iti pagin-innagawan a features iti West Philippine Sea pakairamanan ti Scarborough Shoal idiay Zambales.
Ti Philippine Air Force ket nag-deploy ti dua nga FA50 multi-role fighter jets idinto ti US-PACAF ket nangipatulod ti dua a B-1 bomber aircraft iti nasao a panagsanay.
Inlawlawag ti opisial nga awan ti pakainaganna iti air exercises iti panagbalin nga agresibo ti China a dagiti warships ket namonitor a mangiwaywayat ti illegal a panagserrek ken maritime patrol iti sakupen ti hurisdiksion iti 200 a milya iti Exclusive Economic Zone (EEZ) ti pagilian.
