LAOAG CITY – Ad-adda pay a timmebker ti partnership ti Pilipinas ken Japan kalpasan ti naiwayat a panagpirma ti Reciprocal Access Agreement (RAA) idi kalman iti Malacañang nga inmatangan a mismo ni Presidente Ferdinand Marcos Jr.
Segun kenni Defense Secretary Gilberto Teodoro, ti panagpirma ti Reciprocal Access Agreement ket maibilang kas maysa a milestone a mangsigurado kadagiti rules-based international order ken uray pay ti talna ken kinatalged iti Indo-Pacific Region.
Kinuna ni Teodoro a malaksid iti napapigsa ken napatibker a relasion iti benneg ti ekonomia ken komersio, ket pimmigsa pay ti security aspect no sadinno nga agbalin nga addang daytoy tapno mapatibker pay ti bilateral relations ti dua a pagilian.
Impaganetget ni Teodoro a ti nasao a holistic dimension ket mangnayon iti multilateral efforts ti dua a gobierno tapno masigurado nga adda panagra-em iti international law.
Mamati pay isunaa a ti napabileg ti relasion ken panagkakadua ti Pilipinas ken Japan a mangiturong iti confidence building measures iti nagbaetan ti Japanese Self-Defence Forces ken Armed Forces of the Philippines.
Ita ta napirmaan ti Reciprocal Access Agreement, namnamaen ti naig-iget a joint drills ken military exercises iti nagbaetan dagiti soldado a Pilipino ken Hapon.
Kabayatanna nagyaman ni Sec. Teodoro iti gobierno ti Japan gapu iti tulong nga ipapaayda iti Pilipinas.
