LAOAG CITY – Manamnama a ti ekonomia ti Pilipinas ita a tawen ket pumigsa pay agingga inton 2026.
Basar iti latest World Economic Situation and Prospects report ti United Nations (UN) a namnamaenda ti gross domestic product (GDP) ti pagilian ket dumur-as pay iti 6.1 percent ita a tawen ken dumanon met iti 6.2 percent apaman a madanon ti 2026.
Inawagan ni United Nations Department of Economic and Social Affairs Officer Zhenqian Huang ti Pilipinas kas maysa kadagiti “strongest growth performer” kadagiti pagilian iti paset ti East Asian economies.
Inbatadna a dakkel a tulong iti panagdur-as ti ekonomia ditoy pagilian ket ti napigsa a domestic demand, panangikagumaan ti public investments ken ti positibo nga epekto dagiti investment policy reforms ken ti panangpapigsa kadagiti services sector.
Gapu iti daytoy, ti projections ti United Nations ita a tawen ti Pilipinas ket mabalin a second-fastest growing economy iti rehion kageddan ti Vietnam (6.5%), nangatngato pay iti Cambodia (6%), Malaysia (4.6%), Thailand (3.1%) ken Singapore (2.6%).
Immunan nga inrakurak ni National Economic and Development Authority Secretary Arsenio Balisacan nga agar-aramiddan ti addang tapno ad-adda pay a dumur-as ti ekonomia ti pagilian.
Karaman ditoyen ti inaprobaran ni Presidente Ferdinand Marcos Jr. a macro-economic targets ti Development Budget Coordination Committee (DBCC).
Inbatad ni Balisacan a ti nasao a growth targets ket isu ti mangipasigurado iti posision ti pagilian kas maysa kadagiti fastest growing merging economies iti Asia Pacific Region.
