LAOAG CITY – Saan a nagbaliw ti posision ni Presidente Ferdinand Marcos Jr. maipapan iti maminsan manen a pannakikappeng ti Pilipinas iti Rome Statute, ti katulagan a nangestablisar iti International Criminal Court (ICC).
Inrakurak ni Palace Press Officer Usec. Atty. Claire Castro, inbatad mismo ti Presidente a saan latta nga agsubli a makikappeng ti Pilipinas iti International Criminal Court.
Inlawlawagna nga awanen ti nayon pay a palawag wenno detalye nga inpaay ti Presidente kenkuana.
Rimmuar ti panawagan nga isubli ti panagbalin a miembro ti Pilipinas iti International Criminal Court kagiddan iti panangrugi ti confirmation of charges hearing kontra ken ni dati a Presidente Rodrigo Duterte.
Nagbalin a miembro ti pagilian ti Rome Statute manipud idi 2011 agingga iti 2019 kalpasan a nagikkat ti Pilipinas iti babaen ti napalabas nga administrasion.
