LAOAG CITY – Inpasingked ni Mr. John Michael Sadiwa, tubo iti Mindoro ken elementary teacher idiay Nuntaburi Province, Thailand nga adda da iti natalged a sitwasyon iti agdama.
Daytoy ket kalpasan ti napasamak a pammaltog a nakatayan dagiti 22 a tattao iti maysa a shopping center.
Malaksid iti daytoy ket nasurok 40 dagiti nasugatan babaen ti panagpalto-paltog ti suspek a ni Army Sub. Lt. Jakrapanth Thomma.
Iti ekslusibo a pannakiuman ti Bombo Radyo Laoag kenni Sadiwa, awan met ti ammo na a nagdangran a Pilipino iti nasao a krimen.
Inbunannag ni Sadiwa a kabayatan ti krimen ket nabalakadan da a saan a rumrumwar iti pagadalan wenno pagtaengan.
Kuna na nga agarup dua nga oras iti kaadayo iti lugar da manipud iti siudad ti Nakhon Ratchasima, Thailand.
Innayon ni Sadiwa a ti naiget a pagan-annadan da pay ket ti agwarwaras nga nCoV.
Iti mainaig a damag, nabalakadan dagiti overseas Filipino worker nga agtalinaed iti pagtaengan no awan iti importante a pagturongan idiay Thailand gapu ti 2019 novel corona virus
Iti pannakiuman ti Bombo Radyo Laoag kenni Mr. John Michael Sadiwa, elementary teacher idiay Nuntaburi Province, Thailand, agnanayun ti panagusar da ti face mask ken adda ti makaumanay a suplay iti lugar da.
Inbatad na nga agnanayun laeng a nadalus ti bagbagi ken umadayo kadagiti natatao a lugar.
Innayon ni Sadiwa a limitaran wenno liklikan a makipulapol kadagiti estudyante ken asgusar iti mask no manarimaan ti panagisuro na.
Paset ti panagsarita ni Mr. John Michael Sadiwa elementary teacher idiay Nuntaburi Province, Thailand.
Kabayatanna, natalged pay ti sitwasyon dagiti Filipino idiay Rangsit, Thailand gapu ta awan iti napasamak kadakuada.
Daytoy met iti inpakaammo ni Ms. Angel Queen Erolpan, tubo iti Sultan Kudarat, mangisursuro iti St. Joseph Mong-ek.
Segun kenkuana, naiget ti seguridad iti lugar na ken saan nga agbaybay-a dagiti otoridad.
