LAOAG CITY – Inbatad ni Mr. Christopher Agtang, ti chief tanod ti Barangay 3 iti ili ti Vintar a nabayagen nga agsagsagaba ti sakit ti pimmusay a kabarangayan da a positibo iti covid-19.
Daytoy ket ni IN-C2521, lakay nga agawen ti 89, ken residente iti nasao a barangay.
Segun kenni Agtang, agarop 25 a tawenen nga agda-dialysis ti nasao a pasyente no sadinno nga itay napan a lawas a mapan kuma ag-dialysis ket narikna na a nakapsot ti bagi na.
Gapo iti daytoy, naitaray iti ospital ti lakay ken naduktalan a positibo daytoy iti covid-19.
Kinumpirmaran ni Agtang a manipud kadagiti primary contacts ni IN-C2521 ket nagpositibo iti covid-19 ti asawa ken manugang na a maysa a barangay official.
Kunana a pimmusay ti pasyente idi miyerkules ti malem iti mismo nga ospital iti ciudad ti Batac ken naisangpet laeng idi kalman ti dapo na.
Iti agdama ket naka-isolate dagiti opisyales ti barangay kalpasan a na-expose da iti nagpositibo a brgy official a kadua da ken maiyur-uray ti schedule iti idadalan da iti swab test.
Naamoan a dagiti BHW ken tanod ti agdama a mangimatmaton iti barangay da.
