LAOAG CITY – Naarestar ti maysa a lalaki babaen iti inyuswat a drug buybust operation dagiti kameng ti PNP-Laoag ken City Drug Enforcement Unit iti Brgy. 6 ditoy siudad ti Laoag.
Nabigbig ti suspek a ni Robinson Pasion y Sanguir, pintor ken residente iti Brgy. 3 ditoy siudad ngem agkaskasera iti Brgy. 6.
Nakumpiskar ken ni Pasion ti lima a sachet ti maipagarup a shabu nga agadagup ti 18,000 a pisos nu sadino a maysa ditoy ti nausar iti transaksyun.
Malaksid iti maipagarup a shabu, nakumpiskar pay manipod iti suspek ti 18.8 a gramo ti nagango a bulong ti marijuana nga agdagup ti 1,000 a pisos.
Naamoan a ti suspek ket Top 10 high value individual iti regional target level ken addaan ti dati a kaso a panaglabsing ti RA 9165 idi tawen 2014.
Kabayatanna, naglikudan ti suspek ti akusasyon kenkuana ken inpetteng na a kellaat lattan a sinerrek dagiti otoridad ti pagkaseraan na ken dita a tiniliw da daytoy.
