LAOAG CITY – Balligi a natiliw dagiti pito a babbai babaen iti naiyuswat nga anti-illegal gambling iti PNP-Pasuquin iti Sitio Nagabunga, Barangay 5, Davila iti nasao nga ili.
Segun kenni Police Lt. Roy Manuel Ordinio, chief of police ti PNP-Pasuquin, naarestar dagiti innem a babai nga agpapada a fish vendor ken agpapada a residente iti nasao a barangay ken maysa ti nakalibas.
Nupay kasta, kunana a dagus da a nangiyuswat da ti hot pursuit operation babaen iti tulong dagiti opisyal ti barangay ken balligi a natiliw da ti maikapito a nagsusugal.
Inbatad na a natiliw dagiti nagsusugal iti sirok ti puon ti kayo nga agay-ayam ti kolkol bet game.
Nakumpiskar manipud kadagiti indibidwal ti sangagasot a pisos a pusta ken ti baraha.
Kuna ti hepe a sakbay ti pannakatiliw dagiti pito a babbai ket nakawat da ti report mainaig iti panagsusugal dagitoy rason a dagus da a nangiyuswat da ti operasyon.
Iti agdama ket nagtalinaed dagitoy iti kustudiyar ti PNP-Pasuquin ken mapilaan dagitoy ti reklamo.
